معنديش مشكلة مع النصايح اللي زي 👇
- متشتريش صلصال كل مرة هعلمك طريقة تعمليه بيها في البيت 😌
- السلايم دا بيتباع غالي هبعتلك طريقة تعملي بيها سهل جدا 🙃
- لا وانتي نازلة متجبيش اكل من الصيدليه هاتي علب اكل و اعملي الاكل قبل ما تنزلي 🙈
- لا سيريلاك ايه اللي تشتريه دا مش حلو هبعتلك ازاي تعمليه في البيت 😇
- ارجعي رضعي طبيعي و سيبك من اللبن اللي بتشتريه ☺
- لا هاتي الخضار اللي هتعمليه بيه اكل البيبي اورجانيك 🥲
- ملوخية مجمدة ليه ما تجبيها من السوق خضراء و تخرطيها دي مبتاخدش وقت 🤩
- لا انا مش هشتري لبس جديد للولاد انا هاخد من ورا ولاد اختي مهما اخوات يلبسوا من ورا بعض اعملي كدة انتي كمان متبقيش غاوية مصاريف 😌
- ميبقاش قلبك خفيف كل ما العيل يتعب توديه علي الدكتور 🤨
-ودي العيال تمارين بدل السفر مش هيستفيدوا منه حاجة ☺
- متشتريش سترولير مبيرضوش يقعدوا فيها 🤭 (و من دا كتير) !!
انا بس عندي مشكلة اني افضل اتسأل كل شوية عملتي اللي قلتلك عليه !! 😒
او يلوموني لما اخرج برة السياق و النطاق اللي مفروض كانوا شايفينه ليا و لأولادي 🤔
نصايحكم كلها جميلة و معظمها معاكم حق فيها بس ٩٩% من قرارات اي ست او أم لازم تكون نابعة منها هي لإن دي القرارات اللي هتناسب شخصيتها و ظروفها النفسية و المادية والاجتماعية و كل دا 🙄
مش معني كدة ان دي ست مهملة او مستسهلة او متعالية عليكي او مش عايزة تسمع كلامك عشان مش واثقة فيكي ☺
بالعكس شكرا علي النصيحة بس لو انتي في مكانها و حد عمال يحاول يجبرك علي حاجة هتحسي تلقائي بإنك مش مرتاحة نفسيا، هتتهربي من الكلام و هتحسي بزهق من اشخاص عايزين يفرضوا عليكي شكل معين من طريقة الحياه 😥
الصح كلنا عارفينه والله بس مش كلنا هنقدر نمشي علي المسطرة و نطبقه عشان نثبت لكم اننا بنحب ولادنا 🤥
ادونا النصيحة و متحكموش علينا و بلاش تجلدونا، محدش عارف اصلا احنا جوانا ايه ولا حاسين بأيه 😔
عايزة اقولكم ان جزء كبير جدا للاسف من ثقة الام في نفسها ممكن يهتز لو حست بالتقصير بسبب الضغط بنصايح كتير اوي بعضها اصلا غير قابل للتطبيق العملي بالنسبة لها 😏
فرفقا بالسيدات و خصوصا الأمهات 🤗
وعلي فكرة محدش في الدنيا هيحب ولادنا و يخاف عليهم اكتر ما احنا بنحبهم و بنخاف عليهم ☺ احنا بس بنربيهم بطريقة مختلفة طريقة تناسب حياتنا احنا مش حياه اللي حوالينا ❤
تعليقات
إرسال تعليق